Benitez: Aquilani mun heilla stuðningsmenn Liverpool

Rafael Benitez, stjóri Liverpool, er sannfærður um að nýi miðjumaður liðsins, Alberto Aquilani muni heilla stuðningsmenn félagsins en hann var keyptur í staðinn fyrir Xabi Alonso sem Liverpool seldi til Real Madrid.

„Hann er leikmaður með þá hæfileika sem við erum að leita af. Hann getur spilað aðeins ofar á vellinum en Javier Mascherano kannski á milli hans og Steven Gerrard," segir Benitez.

„Hann er með góðar sendingar og er einnig vinnusamur. Ef hann nær að koma sér vel fyrir í Englandi þá verður hann mikill liðstyrkur," segir Benitez.

„Koma hans ætti að vera spennandi fyrir alla hjá Liverpool. Hann varð Evrópumeistari 19 ára liða með þjóð sinni og endurtók leikinn hjá 21 árs liðunum. Hann hefur líka unnið ítalska bikarinn," sagði Benitez.

Rafael Benitez heillaðist sjálfur af Alberto Aquilani í leik 21 árs liða Ítala og Englendingar á Wembley. „Ég man sérstaklega eftir þeim leik þar sem hann var besti maður vallarins í 3-0 sigri," sagði Benitez.