Cesc Fábregas: Arsenal er á erfiðum tímapunkti

Cesc Fábregas, fyrirliði Arsenal, viðurkennir að það muni reyna mikið á liðið í ensku úrvalsdeildinni í vetur eftir að liðið seldi lykilmennina Emmanuel Adebayor og Kolo Touré til Manchester City.

„Við ætlum ekki að byrja tímabilið á að stefna á fjórða sætið. Það ganga öll lið í gegnum erfiðleika og við erum á erfiðum tímapunkti núna. Við þurfum bara að vera sterkari, standa saman og þá er ég viss um að þetta verði í góðu lagi hjá okkur," sagði Fábregas sem hefur ekki unnið titil með Arsenal síðan 2005.

„Við höfum verið mjög óheppnir með meiðsli á síðustu þremur tímabilum og vonandi verða allir heilir á þessu tímabili. Það eru miklir hæfileikar í þessu liði og ég hef trú á því að við getum farið langt," sagði Fábregas.

„Ég ætla að reyna að bæta allt í mínum leik og ég tel þetta vera rétta tímann fyrir mig að stíga eitt skref fram á við. Ef ég næ líka að skora fleiri mörk þá mun það hjálpa liðinu mikið," sagði Fábregas.

Fábregas segist vera stoltur af unglingastarfi Arsenal. „Menn sáu Jack Wilshere í síðustu tveimur leikjum og þá er Fran Mérida farinn að spila líka með aðalliðinu. Hann kom hingað 15 ára gamall frá Barcelona og nú fjórum árum síðar er hann búinn að bæta sig mikið," sagði Cesc Fábregas.

Cesc Fábregas segist líka vita að fleiri ungum og stórefnilegum leikmönnum hjá Arsenal því hann æfði mikið með varaliðinu þegar hann var meiddur á síðasta tímabili.