Utanríkisráðuneytið kannast ekki við Trichet-gögnin

Upplýsingafulltrúi utanríkisráðuneytisins Urður Gunnarsdóttir segist í samtali við fréttastofu ekki kannast við neinar skýrslur eða gögn sem Davíð Oddsson fyrrverandi seðlabankastjóri vísar til í Morgunblaðinu í dag.

Hann segir að skýrsla sem unnin hafi verið af nefnd á vegum OECD undir stjórn núverandi seðlabankastjóra Evrópu, Jean Claude Trichet, eigi að vera til í Utanríkisráðuneytinu. Í henni sagði að innstæðutryggingakerfið gilti ekki ef um algjört bankahrun er að ræða í viðkomandi landi.

Þá eigi einnig að vera til gögn þar sem fram kemur að Englandsbanki taldi að Íslendingar ættu ekki að greiða fyrir Icesave. Urður sagðist ekki vita um þau gögn sem Davíð vísi til en vinna verði hafin á morgun við að finna þau, séu þau til.

Í viðtalinu í Morgunblaðinu heldur Davíð Oddsson því fram að Steingrímur, auk Ingibjargar Sólrúnar Gísladóttur sem og Jóhanna Sigurðardóttir, hafi stórskaðað hagsmuni Íslendinga með því að gefa út yfirlýsingar um að ríkið stæði straum af Icesave.

Steingrímur spurði þá hvort Davíð væri búinn að gleyma undirskriftinni í haust og vísar þar til þess þegar Davíð, þá seðlabankastjóri, skrifaði undir samning við Alþjóðagjaldeyrissjóðinn um skuldbindingar Íslendinga varðandi Icesave. Steingrímur sagðist enga ástæðu til þess að svara Davíð. Hann vonaði bara einlæglega að hann hefði það gott.