Logi: Hefði viljað geta notað Prinsinn

Logi Ólafsson þjálfari KR viðurkennir að hann hefði gjarnan viljað geta notað Prince Rajcomar í leiknum gegn Val Í VISA-bikarnum en leikmaðurinn fór óvænt á reynslu hjá c-deildarfélaginu MK Dons á Englandi.

„Það er búið að vera stíft leikjaálag á okkur upp á síðkastið og það var vissulega slæmt að missa Prinsinn út. Ég hefði viljað dreifa álaginu á menn betur en ég gat gert.

En við vildum samt vitanlega ekki verið að standa í vegi fyrir að hann færi þarna út til þess að reyna sig. Hollenskur umboðsmaður hans kom þessu í kring fyrir hann og hann verður hjá MK Dons á reynslu í eina viku. Við sjáum svo bara til hvað kemur út úr þessu," segir Logi.