Guðjón mun halda Crewe uppi

Geoff Thomas er fyrrum leikmaður Crewe og spilaði hann 155 leiki fyrir félagið. Hann telur að Guðjón Þórðarson muni bjarga félaginu frá falli úr þriðju efstu deildinni á Englandi.

Crewe er nú með 45 stig þegar aðeins fjórar umferðir eru eftir, þremur stigum fyrir ofan Northampton sem er í fjórða neðsta sæti. Það sæti fellur félag niður um deild.

„Ég hélt að þeir væru á leiðinni niður á botninn, eins og í gamla daga," sagði Thomas sem er goðsögn hjá félaginu. Ekki síst eftir að hann sigraðist á hvítblæði, safnaði yfir milljón pundum til styrktar rannsóknum á sjúkdómnum og kláraði Tour de France hjólreiðakeppnina, sem hann tekur aftur þátt í nú í sumar.

„En nýi kallinn kom sterkur inn," sagði hann um Guðjón. „Þeir hafa náð nokkrum góðum úrslitum og við krossleggjum bara fingur um að þeir haldi genginu gangandi," sagði Thomas.

Crewe á eftir að spila við Oldham (9. sæti) á útivelli, Cheltenham (24. sæti, neðsta liðið) heima, Stockport (12. sæti) úti og að lokum Leicester (1. sæti) heima í lokaleiknum þann 2. maí.

Síðasti sigurleikur Crewe kom þann 14. mars en Guðjón hefur stýrt liðinu í 23 leikjum.

Guðjón hefur unnið níu leiki, tapað átta og gert sex jafntefli.