Petr Cech varði tvær vítaspyrnur og tryggði Chelsea Samfélagsskjöldinn

Bikarmeistarar Chelsea eru búnir að vinna fyrsta titil tímabilsins í ensku úrvalsdeildinni eftir að liðið vann 4-1 sigur á Englandsmeisturum Manchester United í vítakeppni í leiknum um Samfélagsskjöldinn á Wembley í dag. Leiknum sjálfum lauk með 2-2 jafntefli. Þetta var þriðja árið í röð sem úrslitin í leiknum um Samfélagsskjöldinn ráðast í vítakeppni.

Petr Cech varði víti frá Ryan Giggs og Patrice Evra en það var Salomon Kalou sem innsiglaði sigur Chelsea með því að skora úr fjórðu vítaspyrnu liðsins í röð. Þetta var fyrsta vítakeppnin sem Chelsea vinnur frá árinu 1998 en liðið var búið að tapa fimm vítakeppnum í röð.

Þetta er í fjórða sinn sem Chelsea vinnur Samfélagsskjöldinn en liðið vann hann síðast árið 2005. Manchester United hafði byrjað síðustu tvö tímabil á því að vinna þennan árlega leik á Wembley. Carlo Ancelotti vann því titil í sínum fyrsta opinbera leik sem stjóri Chelsea.

Wayne Rooney tryggði Manchester United jafntefli og þar með vítaspyrnukeppni með marki á annarri mínútu uppbótartíma eftir að hafa fengið stungusendingu frá Ryan Giggs inn fyrir vörnina. Það leit þó út fyrir að Rooney hafi verið rangstæður.

Chelsea-liðið gerði mjög vel í að vinna sig aftur inn í leikinn eftir dapran fyrri hálfleik. Liðið sýndi með því styrk sinn eftir að United hafði sýnt mikla yfirburði í upphafi leiks.

Það voru Ricardo Carvalho (52. mínútu) og Frank Lampard (71. mínútu) sem skoruðu mörk Chelsea í seinni hálfleiknum. Í sigurmarki Frank Lampard lá Patrice Evra meiddur á vellinum þegar Chelsea náði skyndisókn og reiddust leikmenn United yfir því að dómarinn hafði ekki stoppað leikinn.

Nani skoraði fyrra mark United strax á 10. mínútu leiksins með skoti fyrir utan vítateig. Petr Cech átti þar að gera betur en hann hefur bætt fyrir þau mistök með frábærri markvörslu seinna í leiknum. Nani fór meiddur af velli í seinni hálfleik og hélt um öxlina sína.

Manchester United-Chelsea 2-2 (1-4 í vítakeppni)

1-0 Nani (10.)

1-1 Ricardo Carvalho (52.)

1-2 Frank Lampard (71.)

2-2 Wayne Rooney (90.+2)

Gangur vítakeppninnar:

Chelsea 1 - Frank Lampard skorar (0-1)

United 1 - Ryan Giggs, Petr Cech varði (0-1)

Chelsea 2 - Michael Ballack skorar (0-2)

United 2 - Michael Carrick skorar (1-2)

Chelsea 3 - Didier Drogba skorar (1-3)

United 3 - Patrice Evra, Petr Cech varði (1-3)

Chelsea 4 - Salomon Kalou skorar (1-4)

United 4 - Þarf ekki

Chelsea 5 - Þarf ekki

United 5 - Þarf ekki