Ásmundur: Mikið óöryggi í varnarleik okkar

Fjölnismenn voru talsvert frá sínu besta í dag þegar liðið tapaði verðskuldað 1-3 gegn Fylki á Fjölnisvelli. Ásmundur Arnarsson þjálfari liðsins var svekktur í leikslok og viðurkennir að liðið hafi nú ekki verið spila vel.

„Við fengum þarna smá möguleika á því að gera eitthvað úr þessu þegar við minnkuðum muninn fyrir lok fyrri hálfleiks en náðum ekki að fylgja því eftir. Við gáfum ódýra aukaspyrnu þegar þeir skoruðu þriðja markið í byrjun síðari hálfleiks og við náðum í raun lítið að ógna þeim eftir það," segir Ásmundur.

Mikið rót hefur verið á varnarleik Fjölnismanna í sumar, meðal annars vegna meiðsla. Ásmundur segir greinilegt óöryggi vera í öftustu varnarlínu liðsins í augnablikinu og hann verði að finna lausn á því.

„Það hefur verið mikið óöryggi í varnarleik okkar og við höfum verið að eiga við talsverð meiðsli í þeirri stöðu hjá okkur, bæði í vetur og nú undanfarið. Ólafur Páll meiddist til að mynda í byrjun móts og nú þegar við ætluðum að þétta þetta með því að fá Gunnar Má þarna niður þá meiddist hann snemma leiks. Hrókeringarnar í varnarleiknum skapa náttúrulega óöryggi og við verðum að vinna áfram í því. Fyrsta skref er að við byrjum á að þétta okkur þarna og síðar einnig annars staðar á vellinum," segir Ásmundur.