Vill að Reykjavíkurborg taki yfir rekstur Reykjavíkurflugvallar

Þorleifur Gunnlaugsson, borgarfulltrúi Vinstri hreyfingarinnar græns framboðs, vill að kannaðir verði kostir þess að Reykjavíkurborg yfirtaki rekstur Reykjavíkurflugvallar. Þorleifur lagði fram tillögu þessa efnis í borgarráði í dag.

Flugstoðir, sem er opinbert hlutafélag, sér um rekstur Reykjavíkurflugvallar en nýlega sögðu Flugstoðir upp samningum við Slökkvilið höfuðborgarsvæðisins um slökkvi- og björgunarþjónustu á flugvallarsvæðinu í Vatnsmýrinni. Það mál var rætt á fundi borgarráðs og samþykktu borgarráðsfulltrúar bókun þar sem lýst var áhyggjum af þessari ákvörðun Flugstoða.