Bílslys í Álftafirði: Líðan mannsins óbreytt og eftir atvikum

Líðan mannsins sem slasaðist alvarlega í bílslysi í Álftafirði á Vestfjörðum í gær, er óbreytt og samkvæmt atvikum, að sögn vakthafandi læknis á gjörgæsludeild Landspítalans. Maðurinn er ekki talinn í lífshættu.

Ferðafélagi mannsins, erlend kona um tvítugt lést í gærkvöld af sárum, sem hún hlaut í slysinu.

Alls voru fjórir í bílnum sem hafnaði utan vegar og valt ofan í fjöru. Konan og maðurinn voru flutt með sjúkraflugi til Reykjavíkur og lögð inn á Slysadeild Landspítalans, þar sem konan lést skömmu síðar. Beita þurfti klippum til að ná fólkinu út úr bílflakinu.

Ekki er vitað um tildrög slyssins en lögreglan á Ísafirði og rannsóknarnefnd umferðarslysa rannsaka málið.