Ólafur Arnarson: Það þarf alvöru menn í skilanefndirnar

„Þú horfir á allt aðra hluti þegar þú ert að velja menn til að stjórna banka annarsvegar og hinsvegar til að skipta þrotabúi," segir Ólafur Arnarson, hagfræðingur og höfundur bókarinnar Sofandi að feigðarósi, um að skilanefndir Glitnis og Kaupþings muni hugsanlega fara með hluti kröfuhafa í nýju bönkunum.

Hann skrifaði pistil á vefblaðið Pressuna um hæfi skilanefndarmanna í gærmorgun.

„Mér finnst það voðalega skrítið að þessar nefndir, sem voru skipaðar í tímahraki í nauðvörn í byrjun október, skuli enn sitja og fara með þetta. Sérstaklega þegar komið hefur á daginn að það hafa átt sér margvísleg mistök við að skipa mennina í nefndirnar," segir Ólafur í samtali við fréttastofu.

En hvaða mistök?

„Hæfismistök," segir Ólafur, og bendir meðal annars á að Árni Tómasson, formaður skilanefndar Glitnis, sitji til dæmis í stjórn Alfesca og þiggi milljón á mánuði fyrir. Þar hafi hann setið um árabil fyrir hönd Ólafs Ólafssonar, en Ólafur Arnarson segir hann eiga mikið undir hagstæðri vindátt í skilanefndinni.

Hann segir Ólafi ekki hafa verið bolað út úr sínum fyrirtækjum, þrátt fyrir að önnur fyrirtæki, til dæmis Icelandair, hafi verið tekin af eigendum sínum.

Fjármálaeftirlitið hefur þó áður svarað því til að seta Árna í stjórn Alfesca hafi almennt ekki áhrif á hæfi hans. Árni sagðist sjálfur ekki ræða málefni Alfesca við samstarfsmenn sína í samtali við fréttastofu RÚV í byrjun árs, og hann viki af fundum þegar svo bæri við.

Þá gerir Ólafur hæfi skilanefndarmanna í Landsbankanum einnig að umtalsefni, en þeir munu að vísu ekki fara með hlut í Nýja Landsbankanum.

Ólafur sakar skilanefndirnar jafnframt um ýmis afglöp í starfi. Hann talar einkum um sölu á eignum Glitnis í Noregi, og segir þær hafa verið seldar allt of ódýrt.

Eins og Vísir greindi frá á síðasta ári var Pal Ringholm, lánagreinandi hjá First Securities, gáttaður á því að starfsemin hafi verið seld á 300 milljónir norskra króna þegar opinbert mat á henni var um 3 milljarðar norskra króna.

Hann segir önnur mistök skilanefndanna minni, en þau safnist hins vegar öll saman.

Ólafur segist hugsa til þess með skelfingu að skilanefndirnar muni fara með eignarhlut í nýju bönkunum.

„Nú á að fara að byggja upp verðmæti í þessum fyrirtækjum og þá þýðir ekkert að vera með einhverja íslenska lögfræðinga og endurskoðendur í því. Það þarf alvöru menn með alvöru burði í þetta."