Engin lögbundin GSM-viðmið notuð

Engin lögbundin viðmiðunarmörk gilda á Íslandi um hámarksstyrk GSM-senda. Geislavarnir ríkisins miða þó við sömu mörk og Evrópusambandið mælir með.

„Það er margt við þessi viðmiðunarmörk sem þarf að skoða og rannsaka, við tökum alveg undir það,“ segir Þorgeir Sigurðsson, fagstjóri hjá Geislavörnum ríkisins. Öll geislun eigi að vera eins lág og hægt sé að komast af með.

Lesendur hafa haft samband við blaðið til að þakka fyrir að greint hafi verið frá fjölskyldu á Egilsstöðum sem fann fyrir óþægindum eftir að GSM-mastur var sett upp á hæð fyrir ofan hús hennar. Þessir lesendur segjast sumir hafa fundið fyrir svipuðum óþægindum í Reykjavík. Fjölskyldan á Egilsstöðum flúði úr húsinu uns slökkt var á sendinum.

í skýrslu sem rafgæðamælingafyrirtæki gerði fyrir fjölskylduna kemur fram að í löndum eins og Sviss, Ítalíu og Kína séu viðmiðunar­mörk fyrir GSM-aflþéttni mun lægri en hjá Evrópusambandinu.

Þorgeir Sigurðsson segir að starfsmenn Geislavarna hafi heyrt af þessum lægri viðmiðum. Hins vegar telur hann ólíklegt að í löndunum sé farið eftir svo lágum mörkum í einu og öllu. Það leiddi að líkindum til verra farsímasambands.

Hann bendir á að athygli norrænna geislavarna sé meiri á símtólunum sjálfum heldur en sendunum og vísar í samnorræna skýrslu sem segir að geislun sú sem fólk verði fyrir af sendunum sé hundrað til tíu þúsund sinnum undir viðmiðunarmörkum Alþjóða geislavarnarráðsins og miklu minni en sú sem það verði fyrir af símunum sjálfum. Frá sendunum stafi þó stöðugum bylgjum, ólíkt símunum.

Spurður hvort Geislavarnir ríkisins hafi mælt útsendingu Egilsstaðasendisins, segir Þorgeir nei. En svo mikið hafi verið talað um sendinn að ekki sé ólíklegt að það verði gert. „Við kíkjum ekki á öll farsímamöstur, það hefur ekki verið talin ástæða til þess,“ segir hann. Annan daginn í röð svaraði bæjarstjóri Fljótsdalshéraðs ekki skilaboðum blaðsins.