Óttast fjárhagsvanda hjá seðlabankafólki

Seðlabankinn segir að verði laun yfirmanna lækkuð niður fyrir laun ráðherra og sú lækkun látin ganga niður launastigann geti starfsmenn fjármálastofnana ríkisins lent í fjárhagserfiðleikum með óheppilegum afleiðingum.

Í umsögn Seðlabankans til efnahags- og skattanefndar Alþingis í aðdraganda breytinga sem gerðar voru á lögum um kjararáð og á fleiri lögum í sumar segir að ýmislegt mæli gegn því að setja hámark á laun embættismanna. Eins og kunnugt er var það ætlun Alþingis að breyta lögum þannig að enginn ríkisstarfsmaður eða starfsmaður félaga í eigu ríkisins yrði launahærri en forsætisráðherra.

„Stofnanir á borð við viðskiptabankana, Seðlabanka Íslands og Fjármálaeftirlitið búa við samkeppnisumhverfi á vinnumarkaði sem kann að vera ólíkt því sem gildir um embættismenn,“ segir í umsögn Seðlabankans.

Fram kemur í umsögninni að bæði Seðlabankinn og Fjármálaeftirlitið hafi á undanförnum árum þurft að keppa um starfsfólk við einkarekin fyrirtæki og lent í vanda vegna þess. Mikilvægt sé að eftirlitsstofnanir séu ekki „kerfisbundið bornar ofurliði“ vegna þess að fyrirtækin sem fylgjast eigi með hafi sterkari stöðu.

„Þó svo að laun séu ekki eina aðdráttaraflið á slíkt fólk er mikilvægt að stofnanir af þessu tagi fari ekki halloka í samkeppni um mannauðinn,“ rökstyður Seðlabankinn andstöðu sína við launalækkunina.

Seðlabankinn býður í umsögninni fram lausn á málinu hvað snertir bankann. „Standi vilji til þess að lækka laun seðlabankastjóra mætti ná fram raunlækkun með því að halda nafnlaunum óbreyttum í nokkur ár,“ segir bankinn, sem þannig gerir tillögu um að laun seðlabankastjóra hækki ekki í takt við verðbólguna og látið verði þar við sitja.

Þá segir Seðlabankinn að launalækkun felist í því að lækka laun áðurnefndra stofnana að ráðherralaunum og varar við því að sú lækkun gangi niður launastigann. Sú lækkun muni koma til viðbótar umtalsverðri kaupmáttarrýrnun og geti „leitt til þess að einstakir starfsmenn komist í fjárhagslega erfiðleika sem yrði afar óheppilegt fyrir viðkomandi stofnanir“.

Eins og fram hefur komið í Fréttablaðinu samþykkti Alþingi í ágúst að breyta lögunum þannig að hjá ríkinu yrði enginn nema forsetinn launahærri en forsætisráðherra. Kjararáði var falið að ákveða laun fjölmargra starfsmanna með hliðsjón af því. Sérstakt ákvæði var þó sett um seðlabankastjóra, sem getur fengið aukagreiðslur samkvæmt ákvörðun bankaráðsins.