Dalabyggð skýtur föstum skotum á samgönguráðherra

Byggðarráð Dalabyggðar lýsir yfir undrun sinni og vonbrigðum með þá ákvörðun samgönguyfirvalda að fresta framkvæmdum við uppbyggingu vegs um Laxárdal en ályktun þess eðlsi var samþykkt í dag hjá byggðarráði Dalabyggðar samkvæmt Grími Atlasyni sveitastjóra þess.

Þá veltir byggðarráð sér hvort það sé betra að tilheyra norð-austur kjördæmi og skjóta þar föstum skotum á Kristján Möller samgönguráðhera sem hefur verið sakaður um að hygla sérstaklega eigin kjördæmi þegar kemur að framkvæmdum.

Orðrétt segir í tilkynningunni:

Byggðarráð Dalabyggðar lýsir yfir undrun og vonbrigðum með þá ákvörðun samgönguyfirvalda að fresta framkvæmdum við uppbyggingu vegs um Laxárdal. Um er að ræða 3,6 km langan kafla sem búið var að hanna, bjóða út og framkvæmdir voru þegar hafnar. Heildarkostnaður verksins var áætlaður rétt um 70 m.kr. og tilboð lægstbjóðenda um 70% af þeirri upphæð.

Það er skiljanlegt að stjórnvöld þurfi fresta verkefnum vegna efnahagsástandsins en það verður að meta hvert verkefni fyrir sig. Búið var að semja og verktakar voru þegar komnir á staðinn og því er ákvörðun um frestun algjörlega óskiljanleg. Við þetta sparast ekki fjármagn því það þarf aftur að leggja í þennan kostnað þegar framkvæmdin verður aftur boðin út.

Byggðarráð Dalabyggðar telur ákvörðun samgögnuyfirvalda ekki byggjast á faglegu mati og veltir því fyrir sér hvort betra hefði verið ef Laxárdalur væri staðsettur í NA-kjördæmi."