Fagnað sem þjóðhetju eftir að hafa strunsað út af fundi

Erdogan, forsætisráðherra Tyrklands, rauk öskureiður af ársþingi Alþjóðaefnahagsráðsins í Davos í Sviss í gær eftir snörp orðaskipti við Peres Ísraelsforseta. Deiluefnið var árásir Ísraela á Gaza. Erdogan var fagnað sem hetju við heimkomuna til Tyrklands í gærkvöldi.

Yfirleitt eru alþjóðaráðstefnur vel skipulagðar. Ræður á réttum stöðum í dagskránni og allt gert til að koma í veg fyrir deilur eins og þær sem urðu á fundi í Davos í Sviss í gær þar sem ársþing Alþjóðaefnahagsráðsins stendur nú sem hæst.

Í pallborði voru Shimon Peres, forseti Ísraels, og Recep Tayyip Erdogan, forsætisráðherra Tyrklands, sem er súnnímúslimi.

Í ræðu sinni varði Peres aðgerðir Ísraela á Gaza. Forsetinn beindi máli sínu einna helst að Erdogan sem hafði rétt áður gagnrýnt Ísraela fyrir að loka landamærunum að Gaza. Peres sagði árásirnar svar við eldflaugaárásum herskárra Hamas-liða.

Eftir ræðu Peres bað Erdogan um að fá eina mínútu til að svara. Fundarstjóri varð við þeirri beiðni. Þá sagði Erdogan Ísraela morðingja og minnist barnanna sem höfðu fallið í árásunum á Gaza. Þá var hann beðinn um að hætta. Erdogan varð þá reiður sagði Peres hafa talað mun lengur en hann sjálfur.

Erdogan sagðist ekki koma aftur til fundar í Davos þar sem hann fengi ekki að tala. Með það rauk hann út en á leiðinni tók Amr Moussa, framkvæmdastjóri Arababandalagsins, í hendina á Erdogan og þakkaði honum fyrir.

Erdogan var fangað sem þjóðhetju þegar hann kom heim í gærkvöldi.

Peres sagði í morgun að þetta yrði vonandi ekki til að skaða samskipti Ísraels og Tyrklands en Tyrkir hafa á síðustu misserum reynt að miðla málum milli Ísraela og Sýrlendinga.