Óvíst hvað Birgitta gerir verði tillaga Bjarna felld

Birgitta Jónsdóttir, þingmaður Borgarahreyfingarinnar, ætlar að styðja tillögu um tvöfalda þjóðaratkvæðagreiðslu um aðildarumsókn að Evrópusambandinu. Hún hefur hins vegar ekkert sagt um það hvernig hún greiðir atkvæði um tillögu ríkisstjórnarinnar um aðildarumsókn að Evrópusambandinu.

Mikið hefur verið gert úr ræðu Birgittu Jónsdóttur þingmanns Borgarahreyfingarinnar í umræðum um þingsályktun ríkisstjórnarinnar um aðildarumsókn að Evrópusambandinu á Alþingi í gær og hún túlkuð á þann veg að hún ætlaði ekki að styðja tillöguna. En þótt Birgitta lýsti ekki yfir stuðningi við tillöguna sagði hún heldur ekkert um það hvernig hún myndi að lokum greiða atkvæði. Hún reifaði hugmyndir sínar um að Alþingi hefði þarfari hnöppum að hneppa í því ástandi sem nú ríkti en að ræða aðildarumsókn að Evrópusambandinu.

Sumarþing á villigötum

„Sumarþingið er á villigötum, við þingmenn á villigötum, þjóðin ráðvillt og á meðan hrynja fyrirtækin og inniviðir samfélags okkar eins og spilaborgir. Forgangsröðun sumarþings ætti að vera eftirfarandi, endurreisn fjármálakerfisins, lækka stýrivexti, lækka raforkuverð til landbúnaðar, tryggja að björgunarnetin sem sett voru út til að aðstoða fjölskyldur landsins í þeirri neyð sem þær eru að kljást við séu ekki full af götum," sagði þingmaðurinn.

Birgitta sagði aðildarviðræður við núverandi aðstæður ekki rétta forgangsröðun.

„Því meira sem ég hef hugleitt þetta ferli, því sannfærðari er ég um að það er algerlega ábyrgðarlaust og sínir umheiminum enn og aftur að hér býr þjóð sem er ekki fær um að axla ábyrgð eða taka afdráttalausar ákvarðanir. Við erum semsagt að fara að ganga til aðildarviðræðna án þess að vilja ganga í ESB. Hvaða rugl er það?"

Hefur ekki umboð

Birgitta sagði að með umsókn að Evrópusambandinu hljóti Íslendingar að ætla sér að ganga í Evrópusambandið og hún hefði ekki trú á að Íslendingar fengju þar einhverja sérmeðferð. Því vildi hún að þjóðin fengi að taka afstöðu til niðurstaðna þeirrar vinnu sem nú lægju fyrir eftir yfirferð utanríkismálanefndar.

„Að sækja um aðild hlýtur að þýða að við viljum gagna í ESB. Þar eð ég hef ekki umboð frá mínum kjósendum til að taka slíka ákvörðun mun ég styðja tvöfallda þjóðaratkvæðagreiðslu sem hægt væri að stefna saman eigi síðar en í kringum upphaf haustþings."

Hvað Birgitta gerir svo ef breytingartillaga um tvöfalda þjóðaratkvæðagreiðslu verður felld, á eftir að koma í ljós við afgreiðslu málsins á Alþingi. En þingflokkur hennar lýsti því yfir við upphaf unmræðna um málið, að hann myndi styðja málið enda væri gert ráð fyrir að þjóðin réði því að lokum í þjóðaratkvæðagreiðslu hvort drög að aðildarsamningi yrðu samþykkt.