Umfjöllun: Stig gerði lítið fyrir Fjölnismenn

Bæði lið gengu ósátt til búningsherbergja í dag þegar Fjölnir og Keflavík gerðu jafntefli 3-3. Þetta stig gerir lítið fyrir Fjölnismenn sem eru á leið niður í 1. deildina. Nánast kraftaverk þarf til svo þeir nái að bjarga sér.

Keflvíkingum hefur gengið brösuglega upp á síðkastið og ekki unnið deildarleik síðan 23. júlí. Þeir hafa enn ekki náð að sigra útileik í sumar.

Leikurinn í dag var opinn og skemmtilegur í hörkufínu veðri í Grafarvoginum. 21. mínúta leiksins var sérstaklega mögnuð en þá komu tvö mörk, Simun Samuelsen skoraði með langskoti og Tómas Leifsson jafnaði fyrir heimamenn strax í næstu sókn.

Áfram hélt rússibanareiðin fyrir þá sárafáu áhorfendur sem mættu í Grafarvoginn í dag. Tveimur mínútum eftir þessi mörk endurheimtu Keflvíkingar forystuna þegar Magnús Sverrir Þorsteinsson skoraði eftir glæsilegan undirbúning Hauks Inga Guðnasonar.

Reynsluboltinn Jónas Grani Garðarsson jafnaði í 2-2 eftir að hafa sloppið einn í gegn og þannig var staðan í hálfleik. Keflvíkingar voru hættulegri í fyrri hálfleiknum en varnarleikur liðsins var aftur á móti átakanlega slakur og Fjölnismenn fengu mjög hættulegar sóknir.

Fjörið hélt áfram í seinni hálfleiknum en þá náðu Fjölnismenn meiri ró í sinn leik og spiluðu ansi vel. Þeir komust yfir 3-2 þegar Tómas Leifsson skoraði sitt annað mark og fengu síðan nokkur færi til að bæta við eftir það.

En Keflvíkingar voru ekki hættir og sveitapilturinn Jón Gunnar Eysteinsson jafnaði metin í 3-3 með fallegu skoti eftir að boltinn hafði dottið til hans fyrir utan teiginn. Reyndist þetta síðasta mark leiksins og sást vel á þjálfurum beggja liða þegar flautað var af að þeir voru alls ekki sáttir við að fá aðeins eitt stig.

Fjölnir - Keflavík 3-3

0-1 Simun Samuelsen (21.)

1-1 Tómas Leifsson (21.)

1-2 Magnús Sverrir Þorsteinsson (23.)

2-2 Jónas Grani Garðarsson (39.)

3-2 Tómas Leifsson (57.)

3-3 Jón Gunnar Eysteinsson (76.)

Fjölnisvöllur. Áhorfendur: Óuppgefið en þeir voru mjög fáir.

Dómari: Þorvaldur Árnason (8)

Skot (á mark): 13-18 (5-9)

Varin skot: Þórður 6 - Jörgensen 2.

Horn: 4-8

Aukaspyrnur fengnar: 10-14

Rangstöður: 6-1

Fjölnir (4-5-1):

Þórður Ingason 5

Gunnar Valur Gunnarsson 4

Marinko Skaricic 5

Ágúst Þór Gylfason 5

(90. Andri Valur Ívarsson -)

Magnús Ingi Einarsson 6

Heimir Snær Guðmundsson 4

(83. Aron Jóhannsson -)

Illugi Þór Gunnarsson 5

Gunnar Már Guðmundsson 7

Andri Steinn Birgisson 4

(90. Kristinn Sigurðsson -)

Tómas Leifsson 7* - Maður leiksins

Jónas Grani Garðarsson 6

Keflavík (4-4-2):

Lasse Jörgensen 5

Guðjón Árni Antoníusson 4

Haraldur Freyr Guðmundsson 3

Bjarni Hólm Aðalsteinsson 4

Alen Sutej 4

Magnús Sverrir Þorsteinsson 5

(90. Magnús Matthíasson -)

Jón Gunnar Eysteinsson 7

Hólmar Örn Rúnarsson 5

Simun Samuelsen 6

Guðmundur Steinarsson 4

(90. Sverrir Sverrisson -)

Haukur Ingi Guðnason 7

(90. Bessi Víðisson -)

Smelltu hér til að opna Boltavaktina og lesa lýsingu leiksins: Fjölnir - Keflavík.