Terry: Þolinmæðin borgaði sig

John Terry, fyrirliði Chelsea, var ánægður með sitt lið eftir 3-0 sigurinn á Burnley í dag. Það tók tíma fyrir Chelsea að brjóta Burnley niður en eftir fyrsta markið var aldrei spurning hvernig leikurinn færi.

„Við fengum fullt af færum í fyrri hálfleik og líklega hefðum við átt að setja tvö mörk á þá snemma. Burnley gerði okkur samt erfitt fyrir eins og ég átti von á," sagði Terry eftir leikinn en Brian Jensen fór mikinn í marki Burnley eins og áður á þessu tímabili.

„Jensen er afar góður. Við lentum í honum í fyrra og þá gerði hann okkur erfitt fyrir rétt eins og núna. Hann hélt þeim inn í leiknum í fyrri hálfleik en við vorum þolinmóðir og það borgaði sig að þessu sinni." 

Chelsea hefur fengið draumabyrjun á tímabilinu og unnið fjóra fyrstu leikina sína.

„Það er mjög mikilvægt að byrja tímabilið vel. Ef menn svo skoða heildarframmistöðu liðsins þá eru allir að vinna fyrir hvern annan. Það eru allir tilbúnir að leggja mikið á sig því við ætlum okkur að vinna deildina," sagði Terry.