Ólafur Þórðarson: Vorum algjörir klaufar

Ólafur Þórðarson þjálfari Fylkis sagði slaka nýtingu á færum hafa orðið sínum mönnum að falli gegn Grindavík í kvöld.

"Það er svo oft þannig í fótboltanum að þegar maður nýtir ekki færin þá er manni refsað og það gerðist hérna í dag," sagði Ólafur eftir leikinn í kvöld.

"Við vorum algjörir klaufar að vera ekki búnir að stúta þessum leik í fyrri hálfleik. Við komum greinilega værukærir inn í seinni hálfleikinn og fengum fljótlega tvö mörk á okkur og það í raun kviknaði aldrei á okkur eftir það."

"Menn voru kannski þungir og þreyttir eftir bikarleikinn en það er þannig að ef maður vinnur ekki fyrir stigunum þá fær maður þau ekki."

"Þeir björguðu mörgum sinnum í algjörri nauðvörn en þeir vildu sigurinn greinilega meira en við svoleiðis að þeir hirtu stigin í dag."

"Við áttum að koma í veg fyrir öll mörkin þeirra. Fyrsta markið er skot af 30 metra færi þar sem enginn setur pressu á manninn og annað markið er léleg hreinsun hjá okkur þar sem boltinn er skallaður niður í teiginn en svoleiðis verða mörkin, menn gera mistök og þeir nýttu sér það í kvöld en við ekki. Það var ekki nægur sigurvilji í liðinu í kvöld," sagði Ólafur að lokum.