West Ham og Wolves sýna Zigic áhuga

Samkvæmt breskum fjölmiðlum í dag hafa ensku úrvalsdeildarfélögin West Ham og Wolves talað við spænska úrvalsdeildarfélagið Valencia um möguleikann á að fá hinn hávaxna Nikola Zigic áður en félagsskiptaglugganum lokar á morgun.

Zigic hefur ekki náð að festa sig í sessi á Mestalla-leikvanginum og aðeins leikið 15 leiki með spænska félaginu síðan hann kom þangað frá Racing Santander árið 2007.

Valencia hefur þráast við að selja stjörnuleikmennina David Villa og David Silva í sumar en gæti verið tilbúið að selja serbneska framherjann fyrir um 7-8 milljónir punda.