Coyle: Fernando er mjög spennandi leikmaður

Nýliðar Burnley í ensku úrvalsdeildinni hafa tryggt sér þjónustu vængmannsins Fernando Guerrero á láni út komandi leiktíð frá Independiente del Valle í Ekvador.

Hinn 19 ára gamli Guerrero heillaði forráðamenn Burnley upp úr skónum á reynslu tíma sínum með félaginu í æfingarferð í Bandaríkjunum á dögunum og knattspyrnustjórinn Owen Coyle er afar ánægður með að fá leikmanninn í sínar raðir.

„Fernando er mjög spennandi leikmaður sér í lagi í ljósi þess að hann er aðeins 19 ára gamall. Félag hans í Ekvador verðleggur hann ekki hátt af ástæðulausu en við náðum að semja um lánssamning út komandi tímabil og svo höfum við forkaupsrétt á honum eftir þann tíma.

Ég er sannfærður um að hann eigi eftir að verða frábær leikmaður í framtíðinni," segir Coyle í samtali við opinbera heimasíðu Burnley.