Argentína og Hondúras á HM

Argentína og Hondúras tryggðu sér í nótt sæti í úrslitakeppni HM sem fer fram í Suður-Afríku næsta sumar.

Argentína vann 1-0 sigur á Úrúgvæ en það var varamaðurinn Mario Bolatti sem skoraði eina mark leiksins á 84. mínútu.

Leikurinn var þrunginn taugaspennu og litu afar fá færi dagsins ljós. Vendipunktur leiksins var þegar að Úrúgvæinn Martin Cacares fékk að líta rauða spjaldið á 84. mínútu fyrir sína aðra áminningu.

Mark Argentínu kom í kjölfar aukaspyrnunnar sem dæmd var á Cacares og þar við sat. Fögnuður Argentínumanna var mikill í leikslok en heimamenn voru afar ósáttir. Cristian Rodriguez fékk til að mynda að líta beint rautt spjald hjá dómara leiksins eftir að leiknum lauk fyrir kjaftbrúk.

Þar sem Chile vann Ekvador á sama tíma í gær varð Úrúgvæ í fimmta sæti riðilsins og á því enn möguleika á að komast á HM. Liðið mætir Kosturíku í umspili í næsta mánuði.

Það var einnig mikil dramatík í Norður- og Mið-Ameríku riðlinum. Kostaríka og Hondúras voru að berjast um þriðja sæti riðilsins og það síðasta sem veitti beinan þátttökurétt á HM.

Kostaríka var með tveggja stiga forystu á Hondúras fyrir leiki gærkvöldsins. Hondúras vann sinn leik, 1-0 gegn El Salvador.

Þar sem Hondúras var með betra markahlutfall en Kostaríka dugði síðarnefnda liðinu ekki jafntefli í sínum leik en liðið mætti Bandaríkjunum á útivelli.

Það leit reyndar vel út fyrir Kosturíku því liðið komst 2-0 yfir í fyrri hálfleik með mörkum Bryan Ruiz. En Michael Bradley minnkaði muninn fyrir Bandaríkjamenn á 72. mínútu og Jonathan Bornstein tryggði þeim svo jafntefli á fimmtu mínútu uppbótartíma leiksins.

Um leið tryggði Bornstein Hondúras farseðilinn til Suður-Afríku.

Það var hinn 36 ára gamli Carlos Pavon sem skoraði sigurmark Hondúras í gær og er hann markahæsti leikmaður undankeppninnar í Norður- og Mið-Ameríku með sjö mörk í tíu leikjum.

Þetta er í annað sinn sem Hondúras kemst á HM en síðast gerðist það árið 1982.