Umfjöllun: Blikarnir sóttu stig í Laugardalinn

Breiðablik náði að kría fram jafntefli gegn Fram á Laugardalsvelli í kvöld en Framararnir voru sterkari aðilinn á löngum köflum í leiknum og þá sérstaklega í fyrri hálfleik.

Leikurinn fór fjörlega af stað í Laugardalnum í kvöld þegar Paul McShane átti skot í slá og yfir strax á annarri mínútu. Atvikið átti þó alls ekki eftir að gefa til kynna um það sem koma skyldi í fyrri hálfleik því leikur liðanna var þá bragðdaufur með eindæmum.

Blikar urðu vissulega fyrir blóðtöku þegar Guðmundur Kristjánsson fór meiddur af velli eftir stundarfjórðung eftir grófa tæklingu frá Paul McShane en Blikar voru langt frá sínu besta.

Blikarnir voru satt best að segja í tómu tjóni í fyrri hálfleik og sóknarleikur þeirra var allt annað en sannfærandi. Ungir og jafnan sprækir sóknarmenn liðsins fundu sig engan veginn og varnarmenn Fram þurftu ekkert að hafa fyrir hlutunum.

Sóknarlega voru Framarar þó ekki nógu sannfærandi en á 37. mínútu var varnarmaðurinn Auðun Helgason nálægt því að skora fyrsta mark leiksins þegar hann átti skalla í stöng eftir hornspyrnu. Staðan í hálfleik var því markalaus en Framarar áttu eins og segir tvö bestu færi fyrri hálfleiksins.

Blikarnir voru einnig bitlausir framan af seinni hálfleik og Framarar virkuðu líklegri til þess að skora, sem þeir og gerðu á 62. mínútu. Fram fékk þá aukaspyrnu úti á kanti og boltinn barst til Auðuns Helgasonar sem nikkaði hann með höfðinu beint fyrir lappirnar á Hjálmari Þórarinssyni sem var réttur maður á réttum stað og skoraði af stuttu færi.

Blikar hresstust eitthvað við að lenda undir og fóru að leika boltanum betur innan liðsins og meiri hreyfing var á boltalausum mönnum. Jöfnunarmarkið kom þó nokkuð óvænt á 72. mínútu en fram að því voru Framarar búnir að lenda í svo til litlum vandræðum með sóknaraðgerðir Breiðabliks.

Breiðablik fékk þá hornspyrnu og eftir hana barst boltinn aftur til Kristins Jónssonar sem sendi á varnarmanninn Kára Ársælsson sem var óvaldaður í teig Framara og þakkaði fyrir sig með því að skalla í netið, 1-1.

Leikurinn varð töluvert opnari eftir jöfnunarmark Blika en Framarar voru þó sem fyrr sterkari aðilinn. Það dugði hins vegar ekki til þess að taka öll stigin í kvöld og niðurstaðan jafntefli.

Tölfræðin:

Fram - Breiðablik 1-1

1-0 Hjálmar Þórarinsson (62.),

1-1 Kári Ársælsson (72.).

Laugardalsvöllur. Áhorfendur: 892

Dómari: Valgeir Valgeirsson (5)

Skot (á mark): 11-7 (8-5)

Varin skot: Hannes Þór 4 - Ingvar Þór 5

Horn: 5-6

Aukaspyrnur fengnar:19-16

Rangstöður: 4-2

Fram (4-5-1):

Hannes Þór Halldórsson 6

Almarr Ormarsson 5

*Auðun Helgason 7 - Maður leiksins

(88., Jón Guðni Fjóluson -)

Kristján Hauksson 6

Sam Tillen 5

Ívar Björnsson 4

(81., Heiðar Geir Júlíusson -)

Halldór Jónsson 5

Paul McShane 5

Daði Guðmundsson 4

Joseph Tillen 5

Hjálmar Þórarinsson 7

Breiðablik (4-5-1):

Ingvar Þór Kale 7

Arnór Sv. Aðalsteinsson 6

Kári Ársælsson 7

Guðmann Þórisson 6

Kristinn Jónsson 7

Finnur Orri Margeirsson 6

Guðmundur Kristjánsson -

(15., Olgeir Sigurgeirsson 5)

Alfreð Finnbogason 5

Guðjón Gunnarsson 3

Kristinn Steindórsson 4

(66., Evan Schwartz 4)

Haukur Baldvinsson 3

(88. Elfar Freyr Helgason -)

Smelltu hér til að opna Boltavaktina og lesa lýsingu leiksins: Fram - Breiðablik.

Þá er einnig hægt að nálgast Boltavaktina í Vodafone Live! farsímaþjónustunni.