Logi: Áttum skilið að fá eitthvað úr leiknum

Logi Ólafsson, þjálfari KR, sagði að sínir menn hefðu átt skilið að fá eitthvað meira úr leiknum miðað við frammistöðu þeirra gegn FH í kvöld.

FH vann 2-1 sigur á KR í vesturbænum í kvöld eftir að heimamenn komust yfir með marki Bjarna Guðjónssonar.

„Það var súrt að fá á okkur bæði þessi mörk því ég held að við vorum að spila ágætlega og höfðum vissulega viljað standa uppi sem sigurvegarar. Það hefði verið að sanngjarnt að fá eitthvað úr þessum leik."

„En það er ekki hægt að kvarta undan framlagi minna manna nema þegar við sofnum á verðinum og fáum á okkur þessi mörk."

„Við vildum þó fá aukaspyrnu við vítateiginn þeirra áður en þeir fóru í skyndisókn og skoruðu sigurmarkið. En svona er þetta bara - dómurunum yfirsést ýmislegt og okkur líka."

Hann segist nokkuð sáttur við byrjun KR í vor, þrátt fyrir allt. „Við hefðum viljað vinna Þrótt heima og fá meira úr þessum leik. En það er nánast heilt Íslandsmót eftir og ég vona að það eigi eftir að vera spennandi og skemmtilegt."