Áætlun stjórnvalda vegna inflúensufaraldar virkjuð meira

„Við köllum þetta hættustig og það þýðir að við förum að virkja meira okkar inflúensuáætlun en ekki bara undirbúa hana. Það þýðir að við þurfum að fara að gera ákveðna hluti sem beinast fyrst og fremst að ferðamönnum til og frá útlöndum," sagði Haraldur Briem sóttvarnalæknir aðspurður hvaða áhrif það hafi hér á landi að Alþjóða heilbrigðisstofnunin hækkaði í kvöld viðbúnaðarstig vegna svínaflensufaraldursins.

Viðbúnaðarstig hefur verið hækkað úr þriðja stigi í það fjórða en stigin eru alls sex. Grunur eða staðfesting um tilfelli berast nú frá hverju landinu af öðru. Veiran er upprunninn í Mexíkó en þar grunar menn að hún hafi valdið yfir 150 dauðsföllum nú þegar.



Engin formleg tilmæli borist

Haraldur segir að embætti sínu hafi ekki borist nein formleg tilmæli frá Alþjóða heilbrigðisstofnuninni. „Þannig að við þurfum aðeins að bíða og sjá til. Við förum yfir þetta í fyrramálið," segir Haraldur. Landlæknisembættið sé í nánu sambandi við Evrópusambandið og sóttvarnarstofnun Evrópu.

„Þegar komið er á fjórða stig ráðleggjum fólki að fara ekki á hættusvæði," segir sóttvarnalæknir.

Haraldur segir hægt að bregðast við með ýmsu móti. „Oftast er það þannig að fólk er beðið um að gefa sig fram ef það hefur einhver einkenni og er að koma frá áhættusvæðum. Strangari stig eru að allir þurfi að fara í gegnum skoðun."

Þá segir Haraldur að í augnablikinu sé ekki mælst til þess að stjórnvöld hér á landi gangi það langt.