Viduka gæti spilað um helgina

Mark Viduka gæti spilað með Newcastle á nýjan leik nú um helgina eftir langa fjarveru vegna meiðsla.

Newcastle mætir Tottenham á útivelli um helgina og sagði Alan Shearer, knattspyrnustjóri Newcastle, að Viduka færi með liðinu til Lundúna.

„Mark Viduka hefur æft með liðinu stærstan hluta vikunnar og fer með okkur," sagði Shearer. „Hann er mjög hæfileikaríkur leikmaður og við trúum því að ef hann helst heill gæti hann spilað stórt hlutverk í fallbaráttunni."

Newcastle er sem stendur í átjánda sæti ensku úrvalsdeildarinnar og er tveimur stigum frá öruggu sæti.

Þá er vonast til þess að varnarmaðurinn Steven Taylor geti byrjað að spila á nýjan leik en hann mun æfa með liðinu á morgun í fyrsta sinn eftir sín meiðsli. Hins vegar er Obafemi Martins tæpur fyrir leik helgarinnar og Jose Enrique enn frá vegna meiðsla.