Basel sýnir Diogo hjá KR áhuga

Jordao Diogo, Portúgalinn í liði KR, hefur leikið feykilega vel að undanförnu með liðinu. Fulltrúar svissneska liðsins Basel hafa fylgst vel með leikjum KR og heillast af leikmanninum.

„Eftir fyrri leikinn hittum við stjórnarmenn úr Basel og þeir voru mjög hrifnir af Diogo. Þeir hafa samt ekkert aðhafst meira í því. Þó stjórnarmenn hafi áhuga þá eru kannski þjálfarararnir ekki alltaf á sama máli," sagði Rúnar Kristinsson, yfirmaður knattspyrnumála hjá KR.

„Hann hefur verið frábær undanfarið og það kæmi manni ekkert á óvart þó erlend lið séu farin að skoða hann af alvöru. Það eru samt engar fyrirspurnir eða tilboð sem hafa borist enn," sagði Rúnar.