Drogba að framlengja samning sinn við Chelsea

Framherjinn Didier Drogba hjá Chelsea mun skrifa undir nýjan samning við félagið í dag en um er að ræða tveggja ára framlengingu á núverandi samningi hans sem átti að renna út næsta sumar.

Útlit er því fyrir að hinn 31 árs gamli Drogba verði á Brúnni til ársins 2012.

„Mér líkar lífið hjá Chelsea og ég hef notið þess að spila fyrir félagið. Vissulega hafa verið erfiðir tímar inni á milli en þá hjálpar að vera í liði með frábærum leikmönnum innanborðs," segir Drogba í viðtali við Sky Sports fréttastofuna.

Drogba féll í ónáð hjá Felipe Scolari, fyrrum stjóra Chelsea, á síðustu leiktíð en sýndi svo sitt rétta andlit eftir að Guus Hiddink tók við stjórnartaununum í lok síðstu leiktíðar.

Carlo Ancelotti, núverandi stjóri Chelsea, mun svo hafa sannfært Drogba um að hann sé í framtíðarplönum félagsins en framherjinn var sterklega orðaður við Inter í sumar.