Reynir Leósson: Heldur betur óskabyrjun

Varnarmaðurinn sterki, Reynir Leósson, var að vonum ánægður með frábæra byrjun og góðan fyrri hálfleik Vals gegn ÍBV í kvöld.

"Heldur betur óskabyrjun, manni hálf brá en við ætluðum að koma grimmir í leikinn og það var mikil stemning inni í klefa fyrir leik. Ætlunin var að setja stóra manninn Marel og Pétur Markan saman, negla yfir þá og keyra á þá og það gekk upp. Hann setti hann á miklum spretti, flott mark," sagði Reynir í kvöld.

"Við lékum á miklu tempói og það er synd að við náðum ekki þriðja markinu til að drepa leikinn alveg. Við vorum sterkari aðilinn allan fyrri hálfleikinn og sérstaklega fyrsta hálftímann og fengum töluvert pláss til að spila í."

"Þetta var erfiðara í seinni hálfleik. Þeir voru grimmari og kannski fórum við að verja forskotið sem við höfðum. Það gekk vel. Þeir sköpuðu sér ekkert nema einhver skot að utan en annars hélt þetta nokkuð vel."

"Það útheimtir töluverða orku að spila á svona háu tempói og fyrir mitt leyti á einbeitti ég mér meira að varnarleiknum í seinni hálfleik enda orðinn aðeins þreyttur," sagði Reynir að lokum.