Atli: Við erum að reyna að finna leiðtogann í liðinu

Atli Eðvaldsson, þjálfari Vals talaði hreint út um stöðu liðsins eftir 2-2 jafntelfi við Keflavík á Vodafone-vellinum í kvöld.

„Við sýndum í kvöld að þegar við höldum boltanum og spilum þá getum við það vel. Þegar við komumst yfir þá förum í það að kýla fram og reyna að forðast hættuna og það er ekki gott. Ég er að reyna að snúa þessu við og það tekur bara tíma," sagði Atli.

Byrjun leiksin var mjög góð hjá Val og Atli var sáttur með hana: „Það er mikil framför og maður fann að þegar þetta var að ganga þá geta strákarnir heilmikið. Ég var ósáttur með að fá jöfnunarmarkið strax. Menn gleyma manni og bolta í fyrra markinu og það má ekki gerast," sagði Atli.

Um afar klaufalegt jöfnunarmark Keflavíkur sagði Atli: „Þegar boltinn skoppar fimm sinnum í teignum með allt liðið í teignum kemur að því sem við erum að leita eftir. Við erum að leita að þeim sem bretta upp ermarnar, taka af skarið og þora," sagði Atli.

„Liðið er brotið og vantar leiðtoga og við erum að reyna að finna hann. Ég, í jakkafötunum, hefði getað hreinsað boltanum í burtu. Þetta mark sýnir ástandið á liðinu, það er enginn sem tekur af skarið," sagði opinskár Atli Eðvaldsson þjálfari Vals að lokum við Vísi.