Fá milljóna bakreikninga vegna kaupréttarsamninga

Ríkisskattstjóri endurskoðar nú álagningu opinberra gjalda á alla sölu- og kaupréttarsamninga sem gerðir hafa verið undanfarin ár.

„Þeir sem eru með kauprétti eða sölurétti hafa oftast fært ávinninginn sem fjármagnstekjur. Við lítum svo á að þetta séu ekkert annað en launatekjur," sagði Skúli Eggert Þórðarson ríkisskattstjóri við Fréttablaðið. „Það er launþegasamband milli þeirra aðila sem gera samninginn."

Hann segir að ríkið hafi verið hlunnfarið um skatttekjur sem nemi að minnsta kosti hundruðum milljóna króna.

Algengt er að vanframtaldar tekjur séu á bilinu tuttugu til fjörutíu milljónir króna í hverju máli, segir Skúli Eggert. Í stað þess að greiða 7,4 til 14,8 milljónir í tekjuskatt og útsvar hafi menn greitt tvær til fjórar milljónir króna í fjármagnstekjuskatt. Þótt flestir hafi staðið þannig að verki hafa sumir talið fram launatekjur og greitt tekjuskatt og útsvar, að sögn Skúla Eggerts.

Skúli Eggert segir að flestir þeir sem fengu kaupréttarsamning hafi unnið hjá fjármálastofnunum og stærri fyrirtækjum. „Þetta eru tugir eða hundruð manna," segir hann. Tekjum hafi ekki verið leynt heldur voru þær ranglega taldar fram sem fjármagnstekjur en ekki launatekjur.

Skúli Eggert segist hvorki hafa handbærar tölur um fjölda málanna né nákvæmar tölur um þær fjárhæðir sem séu í húfi fyrir ríkið og sveitarfélögin. Hann segir að hundruð milljóna króna sé mjög varlega áætlað. Aðgerðir skattyfirvalda vegna þessa eru nú komnar í fullan gang. Yfirskattanefnd hefur þegar fjallað um eitt mál af þessu tagi og staðfesti skilning ríkisskattstjóra. Þar er um að ræða mann sem skatturinn krefur um þrjátíu til fimmtíu milljónir króna. Sá hefur vísað máli sínu til dómstóla.

Enn hefur ekki verið tekin ákvörðun um hve langt aftur í tímann þessi skoðun mun ná. Ríkisskattstjóri hefur heimild til að kanna mál af þessu tagi allt að sex ár aftur í tímann.