Hahnemann til Wolves

Enska úrvalsdeildarfélagið Wolves hefur ákveðið að semja við bandaríska markvörðinn Marcus Hahnemann sem lék síðast með Reading.

Reading ákvað að endurnýja ekki samning sinn við Hahnemann eftir að félaginu mistókst að vinna sér sæti í úrvalsdeildinni í vor. Það tókst hins vegar hjá Wolves og mun því Hahnemann leika í úrvalsdeildinni á næstu leiktíð.

Hahnemann er þó hugsaður sem varamaður fyrir Wayne Hennessey sem hefur verið aðalmarkvörður Úlfanna.

Fyrr í vikunni fékk Wolves miðvallarleikmanninn Nenad Milijas frá Rauðu stjörnunni í Belgrad. Kaupverðið var ekki gefið upp.