Ólíklegt að ríkið komi að uppbyggingu á Valhallarreitnum

Ólíklegt er að afkoma ríkissjóðs á næstum árum leyfi byggingu nýs húss á Þingvöllum í stað þess sem brann í júlí, að mati Jóhönnu Sigurðardóttur forsætisráðherra. Hún hefur ekki hug á að breyta fyrirkomulagi yfirstjórnar þjóðgarðsins á Þingvöllum. Þetta kemur fram í svari Jóhönnu við fyrirspurn Sigurðar Inga Jóhannssonar, þingmanns Framsóknarflokksins, um uppbyggingu á Þingvöllum.

Hótel Valhöll brann til kaldra kola 10. júlí. Engin ákvörðun hefur enn verið tekin um hvort byggja eigi að nýju á reitnum. Ný Þingvallanefnd var skipuð 11. ágúst.

Jóhanna hefur áður sagt að ekki sé sjálfgefið að hótel verði endurbyggt á reitnum í fyrri mynd.

Fram kemur í svari hennar að talið sé að rekstrarhæft hótel á Þingvöllum þurfi að hafa yfir að ráða allt að 80 gistiherbergjum. Umfang sem fylgir hótelrekstri rúmast því varla á Valhallarreitnum.

Hús hugsanlega reist fjær vatninu

Þar segir að bæjarstæði Valhallar sé á viðkvæmum stað með tilliti til landsigs og Þingvallavatns og mikilvægis verndunar þess. Jóhanna segir að ef til kæmi þess að samþykkt yrði að reisa samkomuvettvang á vegum ríkisins á Þingvöllum komi til greina að húsinu verði valinn staður fjær vatninu.

„Í húsinu mætti gera ráð fyrir veitingaaðstöðu, aðstöðu fyrir minni ráðstefnur á vegum ríkisins, aðstöðu fyrir Alþingi og e.t.v. lítils háttar gistiaðstöðu. Ólíklegt er að afkoma ríkissjóðs leyfi byggingu af þessum toga á næstu árum," segir Jóhanna.

Söguleg og menningarleg sérstaða



Jóhanna telur ekki vera ástæðu til að breyta fyrirkomulagi yfirstjórnar þjóðgarðsins á Þingvöllum. Sérstaða svæðisins sé fyrst og fremst söguleg og menningarleg.