O´Neill kærður fyrir að veitast að dómara

Enska knattspyrnusambandið hefur kært Martin O´Neill stjóra Aston Villa fyrir framkomu hans við dómara eftir tap liðsins gegn Manchester United um síðustu helgi.

Villa-liðið var yfir 2-1 þegar skammt var eftir af leiknum en tapaði honum 3-2. O´Neill setti spurningamerki við frammistöðu dómarans undir lokin og stormaði inn á völlinn til að tala við Mike Riley um leið og hann flautaði leikinn af.

Það var þetta látbragð hans sem varð kveikjan að kæru knattspyrnusambandsins, en ekki hörð gagnrýni hans á ákvarðanir Mike Riley á blaðamannafundi eftir leikinn.

O´Neill hefur frest til 27. apríl til að svara fyrir sig í málinu.