Umfjöllun: Roksigur Grindavíkur gegn Val

Grindvíkingar unnu nokkuð sanngjarnan sigur á Valsmönnum í rokleik í Grindavík í kvöld. Þeir eru því komnir úr fallsæti Pepsi-deildarinnar og sitja með 15 stig í 9.sæti. Valsmenn hafa hinsvegar ekki unnið sigur síðan 11.júlí og sitja í 6.sæti deildarinnar.

Grindvíkingar sóttu undan sterkum vindi í fyrri hálfleiknum. Þeir hófu leikinn betur og strax á 5.mínútu kom Bogi Rafn Einarsson þeim yfir með marki eftir hornspyrnu Scott Ramsay. Kjartan Sturluson markvörður Vals virtist hálf villtur í markteignum og Bogi var illa dekkaður af varnarmönnum Vals.

Valsmenn settu meiri kraft í leik sinn eftir markið og náðu oft ágætum samspilsköflum. Það voru hinsvegar Grindvíkingar sem bættu við öðru marki á 17.mínútu. Scott Ramsay átti þá sendingu frá hægri, beint á kollinn á Páli Guðmudssyni sem var einmana á vítateigslínunni og skallaði boltann í boga yfir Kjartan í markinu. Kjartan stóð heldur framarlega en vindurinn hjálpaði Páli líklega aðeins.

Valsmenn virtust slegnir eftir markið og Grindvíkingar þjörmuðu vel að þeim. Ramsay var þeirra hættulegastur og vörn Vals var engan vegin að finna sig í hálfleiknum. Arnar Gunnlaugsson kom knettinum í mark Grindavíkur fyrir leikhlé, en skot hans fyrir utan vítateig hafði hins vegar viðkomu í Helga Sigurðssyni sem var rangstæður og markið því dæmt af.

Valsmenn hófu síðari hálfleikinn af miklum krafti. Þeir fengu nokkur góð tækifæri til að minnka muninn strax í upphafi, þá sérstaklega Arnar Gunnlaugsson sem hefði getað gert betur í sínum færum. En það var á 61.mínútu sem Valsarar brutu ísinn. Þá skoraði Atli Sveinn Þórarinsson með skalla eftir hornspyrnu.

Eftir þetta urðu eflaust margir Grindvíkingar smeykir því flestir bjuggust við áframhaldandi stórsókn Vals. Það varð þó ekki raunin því sóknarleikur Vals var gjörsamlega bitlaus eftir að þeir skoruðu og Grindvíkingar náðu tökum á leiknum.

Gilles Ondo gerði loks út um leikinn á 81.mínútu og tryggði Grindvíkingum um leið nokkuð sanngjarnan sigur sem kemur þeim úr fallsæti Pepsi-deildarinnar. Valsmenn sitja hins vegar í 6.sætinu og hafa eins og áður segir ekki unnið sigur í Pepsi-deildinni síðan 11.júlí, sem hlýtur að valda Hlíðarendapiltum áhyggjum.

Grindavík - Valur 3-1

1-0 Bogi Rafn Einarsson (5.mín)

2-0 Páll Guðmundsson (17.mín)

2-1 Atli Sveinn Þórarinsson (61.mín)

3-1 Gilles Mbang Ondo (81.mín)

Grindavíkurvöllur. Áhorfendur: 514

Dómari: Jóhannes Valgeirsson (7)

Skot (á mark): 12-10 (8-5)

Varin skot: Óskar 2 - Kjartan 7

Horn: 8 - 10

Aukaspyrnur fengnar: 8 - 13

Rangstöður: 0 – 2

Grindavík (4-5-1)

Óskar Pétursson 7

Ray Anthony Jónsson 6

Zoran Stamenic 5

Óli Stefán Flóventsson 7

Bogi Rafn Einarsson 7

(89 Emil Daði Símonarson -)

Scott Ramsay 8 - Maður leiksins

Eysteinn Húni Hauksson 5

(57 Tor Erik Moen 6)

Páll Guðmundsson 6

(72 Þórarinn Brynjar Kristjánsson -)

Jóhann Helgason 5

Jósef Kristinn Jósefsson

Gilles Mbang Ondo 8

Valur (4-4-2)

Kjartan Sturluson 6

Steinþór Gíslason 4

(58 Ian Jeffs 6)

Reynir Leósson 4

Atli Sveinn Þórarinsson 7

Bjarni Ólafur Eiríksson 5

Matthías Guðmundsson 5

Sigurbjörn Hreiðarsson 5

Baldur Aðalsteinsson 6

Arnar Gunnlaugsson 6

Helgi Sigurðsson 4

Pétur Georg Markan 4

(72 Guðmundur Steinn Hafsteinsson -)

Smelltu hér til að opna Boltavaktina og lesa lýsingu leiksins: Grindavíkur - Valur

Þá er einnig hægt að nálgast Boltavaktina í Vodafone Live! farsímaþjónustunni.