Bjarni Jóh.: Engar áhyggjur af framhaldinu

„Mér fannst við koma miklu betur inn í leikinn en þeir. Áttum frumkvæðið lengi framan af fyrri hálfleik og það var synd að setja ekki eitt mark þá," sagði Bjarni Jóhannsson, þjálfari Stjörnunnar, eftir 2-1 tap hans manna gegn Blikum í kvöld.

„Svona heilt yfir þá var þetta hnífjafn leikur. Okkar mistök voru að falla of mikið til baka eftir markið sem við skorum. Þá töpum við miðjunni. Við náðum samt að rífa okkur út úr því en það dugði ekki því miður," sagði Bjarni.

Tapið í kvöld var annað tap Stjörnunnar á skömmum tíma en liðið var kjödregið í bikarnum gegn Fylki. Hvaða áhrif heldur Bjarni að þessir tveir leikir hafi á liðið?

„Þetta bikartap var auðvitað bara stórslys. Við spiluðum ágætan leik hér í kvöld þrátt fyrir bikartapið þannig að ég hef engar áhyggjur af framhaldinu."