Ásmundur: Eitt stig betra en ekkert

„Við hefðum getað komist tveimur mörkum yfir í fyrri hálfleik en Gunnar Már skallaði beint á markvörðinn. Eftir það duttum við aðeins niður," sagði Ásmundur Arnarsson, þjálfari Fjölnis, eftir 1-1 jafnteflið í Grindavík.

„Þeir voru mun meira með boltann en við áttum hættuleg skyndiupphlaup svo möguleikarnir voru alveg til staðar. Ég hefði frekar þegið að taka þrjú stig en þetta er erfiður útivöllur. Eitt stig er betra en ekkert og við höldum áfram að safna."

Bæði mörkin komu í fyrri hálfleik. „Seinni hálfleikurinn þróaðist þannig að bæði lið áttu upphlaup sem lítið kom úr. Þetta var ákveðið miðjumoð en hefði getað dottið í báðar áttir. En ekkert var skorað vegna lélegra lokasendinga hjá báðum liðum í sjálfu sér," sagði Ásmundur Arnarsson.