Banaslys á Ólafsfjarðarvegi

Alvarlegt umferðarslys varð á Ólafsfjarðarvegi við bæinn Krossa laust fyrir klukkan 15 í dag með þeim afleiðingum að karlmaður á sjötugsaldri lést. Hálka var á veginum.

Áreksturinn varð þegar tvær bifreiðar, sem komu úr sitt hvorri áttinni, lentu saman. Lögreglu- og sjúkraflutningamenn frá Akureyri og Dalvík fóru þegar á vettvang.

Ökumennirnir sem voru einir í bifreiðum sínum voru fluttir á sjúkrahúsið á Akureyri til aðhlynningar þar sem ökumaður annarrar þeirrar, karlmaður á sjötugsaldri, var úrskurðaður látinn. Hinn ökumaðurinn, sem var kona á sjötugsaldri, er ekki talin alvarlega slösuð.

Báðar bifreiðarnar eru ónýtar eftir slysið.

Rannsóknardeild lögreglunnar á Akureyri vinnur að rannsókn slyssins í samvinnu við Rannsóknarnefnd umferðarslysa.

Ekki er hægt að greina frá nafni hins látna.