Aukinn kostnaður við velferðarmál nemur 25 milljörðum á árinu

Kostnaður við velferðarkerfið hefur aukist um meira en 25 milljarða á þessu ári. Þetta kom fram í svari Steingríms J. Sigfússonar, fjármálaráðherra, við fyrirspurn Guðlaugs Þórs Þórðarsonar, þingmanni Sjálfstæðisflokksins.

Guðlaugur lagði fyrirspurn fyrir á þingfundi í dag þar sem hann spurði um áætlaðan kostnað við ýmis verkefni, þar á meðal viðbætur við velferðarkerfið samkvæmt stjórnarsáttmálanum, endurskoðun framfærslugrunns LÍN og fleira.

Í svari fjármálaráðherra kom fram að við núverandi aðstæður í ríkisfjármálum væri ekki staða til að auka útgjöld til velferðarmála, en reynt verði að standa vörð um velferðarkerfið með ýmsum leiðum.

Þannig sé það eindreginn ásetningur stjórnvalda að standa vörð um atvinnuleysistryggingkerfið, en útgjöld til hans aukast um 22 millarða á þessu ári til viðbótar við hækkun síðasta árs. Þeirri aukningu hafi verið reynt að mæta með því að hækka tryggingagjald.

Þá hafi aukinn kostnaður vegna vaxtabótagreiðslna numið rúmum 2,3 milljörðum og milljarði vegna húsaleigubóta.

Einnig hefur hækkun frítekjumarks ellilífeyrisþega um tíu þúsund krónur orsakað aukin útgjöld upp á sjö hundruð milljónir. Efling ráðgjafarstofu heimilanna hafi útheimt 40 milljóna útgjaldahækkun.

Þá verði 100 milljónum til viðbótar varið til eflingar símenntunar og fullorðinsfræðslu á næsta ári.

Ráðherra sagði ekki til um hversu miikill kostnaður fylgdi endurskoðun framfærslugrunns LÍN, en sagði þó í skoðun að draga úr þeim mun sem er á atvinnuleysisbótum og framfærslulánum.