Umfjöllun: Gjafmildir Grindvíkingar

Atli Viðar Björnsson skoraði tvívegis og Matthías Vilhjálmsson var með eitt þegar FH vann 3-0 útisigur á Grindavík í kvöld. FH-ingar halda toppsæti deildarinnar.

FH-ingar voru mun beittari strax í byrjun leiks og náðu forystu á 9. mínútu eftir fáránlegan varnarleik Grindavíkur. Óskar Pétursson var með furðulega tilburði í markinu og Stamenic gerði sig síðan sekan um slæm mistök sem gerðu það að verkum að Matthías Vilhjálmsson fékk knöttinn í dauðafæri og skoraði örugglega.

Eftir þetta mark vöknuðu Grindvíkingar og komust betur inn í leikinn. FH-ingar voru þó enn hættulegri en náðu ekki að bæta við mörkum og staðan 0-1 í hálfleik.

Grindvíkingar skiptu yfir í 4-4-2 í hálfleik og lentu FH-ingar í nokkru basli. En á 51. mínútu gerðu Grindvíkingar sig aftur seka um herfileg varnarmistök þegar þeir náðu ekki að hreinsa boltann úr teignum og gestirnir refsuðu. Atli Viðar var aleinn og óvaldaður og átti ekki í vandræðum með að skora.

Þetta mark gerði í raun og veru út um leikinn sem varð ekki spennandi eftir það. FH-ingar áttu tvö sláarskot áður en Atli Viðar innsiglaði 3-0 sigur þeirra og góðan leik sinn með skalla við fjærstöng eftir hornspyrnu.

Nokkrir lykilmenn Grindvíkinga voru langt frá sínu besta í þessum leik, þar á meðal Zoran Stamenic sem var aðeins skugginn af sjálfum sér. Sérstaklega í byrjun leiks þar sem ekki stóð steinn yfir steini í spilamennsku hans.

Sterkur útisigur FH-inga sem halda sér á toppi deildarinnar en Grindvíkingar eru enn í basli á hinum helmingi töflunnar.

Grindavík - FH 0-3

0-1 Matthías Vilhjálmsson (9.)

0-2 Atli Viðar Björnsson (51.)

0-3 Atli Viðar Björnsson (84.)

Grindavíkurvöllur. Áhorfendur: 1.110

Dómari: Magnús Þórisson 6

Skot (á mark): 6-16 (1-6)

Varin skot: Óskar 2 - Daði 1

Hornspyrnur: 4-8

Rangstöður: 1-0

Aukaspyrnur: 10-14

FH (4-3-3)

Daði Lárusson 6

Guðmundur Sævarsson 6

(Freyr Bjarnason x)

Tommy Nielsen 7

Pétur Viðarsson 6

Hjörtur Logi Valgarðsson 7

Davíð Þór Viðarsson 7

Ásgeir Gunnar Ásgeirsson 7

(Björn Daníel Sverrisson 6)

Matthías Vilhjálmsson 7

Atli Guðnason 6

(Tryggvi Guðmundsson x)

Atli Viðar Björnsson 8 - Maður leiksins

Alexander Söderlund 6