Atli Viðar: Við vorum á tánum

Atli Viðar Björnsson skoraði tvívegis fyrir FH sem vann 3-0 útisigur á Grindavík í kvöld. Hann gerði út um leikinn í seinni hálfleik eftir að Matthías Vilhjámsson hafði brotið ísinn snemma leiks.

„Við vorum í basli í upphafi seinni hálfleiks. Við hefðum getað skorað fleiri mörk í þeim fyrri en fyrstu mínúturnar í seinni hálfleik voru ekki góðar. Það léttist mikið eftir að við skoruðum annað markið," sagði Atli.

„Eftir það varð þetta nokkuð þægilegt. Við vorum á tánum og nýttum það sem féll fyrir okkur. Ég er ánægður með góðan sigur og liðið spilaði vel." Varnarleikur Grindvíkinga í tveimur fyrstu mörkunum var ekki til útflutnings. „Koma ekki öll mörk eftir mistök í vörn andstæðingana? Kannski líta þau misjafnlega illa út. Við vorum allavega vel vakandi. Við erum búnir að koma okkur í þá stöðu að meðan við erum að vinna okkar leiki þá erum við á toppnum."