Fækkun farsímamastra gæti aukið geislun

Geislavarnastofnanir Finnlands, Svíþjóðar, Noregs, Danmerkur og Íslands hafa sent frá sér sameiginlega yfirlýsingu varðandi geislun á almenning frá fjarskiptamöstrum á almannafæri. Niðurstaða þeirra er að ekki hafi verið færð fyrir því gild vísindaleg rök að þessi geislun, eins og hún er nú í venjulegu umhverfi fólks, hafi skaðleg heilsufarsleg áhrif. Stofnanirnar telja þó að fækkun farsímamastra gæti aukið geislun á almenning. Þetta kemur fram á vef Geislavarna ríkisins.

„Geislun frá fjarskiptasendum er nú hvarvetna í umhverfi okkar. Dæmigerður styrkur hennar er örlítill, langt undir einu prósenti af viðmiðunargildum Alþjóðageislavarnaráðsins fyrir ójónandi geislun (ICNIRP). Þess vegna telja norrænu geislavarnastofnanirnar ekki þörf á frekari aðgerðum að svo stöddu til að draga úr þessari geislun," segir á vef Geislavarna.

Geislavarnastofnanirnar á Norðurlöndum telja engu að síður að hafa verði í huga að í mörgum tilvikum hefur tæknibúnaður sem sendir frá sér þessa geislun verið notaður skemur en tvo áratugi. Þess vegna sé nauðsynlegt að halda áfram rannsóknum á hugsanlegum heilsufarsáhrifum geislunar frá fjarskiptasendum og stöðugt endurmat verði að fara fram á vísindaniðurstöðum á þessu sviði.

„Norrænu geislavarnastofnanirnar ítreka að til þess að draga úr heildargeislun á almenning frá fjarskiptabúnaði, þarf í skipulagi bæði að taka mið af geislun frá sendimöstrum og handtækjum, t.d. farsímum."

Farsímarnir valda mun meiri geislun á almenning en möstrin, að mati norrænu geislavarnastofnanna. „Yrði farsímamöstrum fækkað þyrftu símarnir að senda út af auknu afli til að viðhalda tengingu, með hugsanlegri aukningu geislunar á notendur þeirra í kjölfarið."