Wigan ætlar að halda Cattermole - Valencia og Scharner á förum

Stjórnarformaðurinn Dave Whelan hjá Wigan ítrekaði í dag að félagið ætli alls ekki að selja miðjumanninn Lee Cattermole en nokkur úrvalsdeildarfélög eru búin að spyrjast fyrir um kappann. Þar á meðal Steve Bruce og félagar hjá Sunderland.

„Lee fer ekki neitt. Hann er alls ekki til sölu því það er ekki hægt að fylla skarð leikmanna á borð við hann," segir Whelan í samtali við Sky Sports fréttastofuna um U-21 árs landsliðsmann Englands.

Whelan staðfesti þó að Antonio Valencia og Paul Scharner væru mjög líklega á förum frá Wigan en Manchester United er sterklega orðað við Valencia og Fulham er sagt vera nálægt því að landa Scharner.