Landsvirkjun blæs til fundar um nýsköpun

„Sú var tíðin að allt of margir fóru í gegnum svæðið án þess að stoppa. Á Norðurlandi vestra er margt að sjá,“ segir Þorsteinn Hilmarsson, upplýsingafulltrúi Landsvirkjunar, sem stendur fyrir samráðsfundi um umhverfisvænar áherslur í atvinnu- og menningar­lífi á svæðinu í samstarfi við Vaxtarsamning Norðurlands vestra í dag. Blásið er til fundar­ins í Blönduvirkjun og stendur hann yfir í fjórar klukkustundir.

Þorsteinn segir forsvarsmenn Alþjóðlegu athafnavikunnar hafa átt frumkvæðið að því að leita til Landsvirkjunar, sem setti samstundis höfuðið í bleyti. Niður­staðan hafi verið sú að leita sóknar­færa á Norðurlandi vestra í samstarfi við íbúa svæðisins.

Í fyrstu var hugmyndin að líkja eftir Þjóðfundinum í Reykjavík um síðustu helgi og kalla til fólk eftir úrtaki. Þeirri hugmynd var hins vegar kastað fyrir róða og ákveðið að boða á bilinu tuttugu til 25 manns af Norðurlandi vestra með brennandi áhuga á málinu til að ræða málin og leita leiða til að gera hugmyndir sínar að veruleika.

Rætt verður um þau sóknarfæri sem felast í umhverfisvænum áherslum í atvinnu- og menningarlífi í fjórðungnum. Þar á meðal er nýsköpun af ýmsu tagi, betri nýting afurða, náttúruvernd og aðgengi að náttúruperlum.

Þorsteinn segir Landsvirkjun hafa verið að vinna að samfélagslegri stefnu fyrirtækisins enda vilji það marka sér stefnu á þeim stöðum sem fyrirtækið er með starfsemi. Það vilji taka þátt í verkefnum sem geti af sér jákvæða þróun. Fundurinn í dag er liður í því. Raunar sé undir heimamönnum komið að vinna úr þeim hugmyndum sem fram koma á fundinum í dag. Sé samhljómur um að halda áfram með ákveðin mál sé Landsvirkjun tilbúin til að styðja við það.

„Ég lít á þetta sem lærdóm fyrir okkur. Við getum hugsað okkur að skoða önnur svæði þar sem við erum með starfstöð. Kannski skoðum við þetta áfram á öðrum svæðum landsins,“ segir Þorsteinn.

jonab@frettabladid.is