Sjötti maðurinn handtekinn - stúlkan aðeins 19 ára

Sjötti maðurinn, sem talinn er tengjast meintu mansalsmáli á Suðurnesjum, verður yfirheyrður í dag. Litháíska stúlkan sem kom hingað til lands, hugsanlega til að stunda vændi, er nítján ára. Maðurinn, sem einnig er Lithái og búsettur hérlendis, var handtekinn í gærkvöldi. Hann er nú í haldi lögreglu og verður yfirheyrður síðdegis. Í framhaldinu verður tekin ákvörðun um hvort óskað verði eftir gæsluvarðhaldsúrskurði yfir honum.

Fyrir eru fimm karlmenn í haldi vegna hins meinta mansalsmáls og voru þeir allir úrskurðaðir í gæsluvarðhald til miðvikudags. Mennirnir eru allir taldir tengjast ungu litháísku konunni með einum eða öðrum hætti, en hún kom hingað til lands á fölsuðum ferðaskilríkjum fyrir um tíu dögum. Talið er að neyða hafi átt stúlkuna í vændi.

Hún gaf upp rangt nafn við komuna til landsins, en hefur nú sagt til sín og hefur það verið sannreynt. Stúlkan er aðeins 19 ára, fædd árið 1990, en verið er að kanna bakgrunn hennar betur í samstarfi við alþjóðadeild ríkislögreglustjóra. Konan er nú á vegum lögreglunnar á Suðurnesjum og verður ekki ákveðið neitt um framhaldið fyrr en rannsókn málsins er lengra komin.

Sigríður Björk Guðjónsdóttir, lögreglustjóri á Suðurnesjum, segir málið mun umfangsmeira en talið var í fyrstu. Hinir handteknu séu allir grunaðir um að tengjast skipulögðum glæpahópi, sem hafi alþjóðleg tengsl. Umrætt mál er eingöngu rannsakað sem mansalsmál, jafnvel þótt talið sé að mennirnir tengist annari glæpastarfsemi einnig. Afar erfitt er að færa sönnur á mansal og hefur slíkt mál aldrei komið fyrir dóm á Íslandi.