Guðmann: Marel verður tekinn nokkrum sinnum niður í kvöld

Sjöundu umferð Pepsi-deildar karla lýkur í kvöld þegar Breiðablik tekur á móti Val á Kópavogsvellinum.

Marel Baldvinsson snýr aftur á sinn gamla heimavöll en hann yfirgaf herbúðir Blika korteri fyrir mót eftir deilur við stjórn félagsins og gekk í raðir Vals.

Verður áhugavert að sjá hvaða móttökur hann fær frá stuðningsmönnum Blika en það er ljóst að það verður fast tekið á honum á vellinum.

„Það verður vel tekið á Marel, ég get alveg lofað því. Það á eftir að koma í ljós hvort hann verður straujaður eitthvað harkalega en ég get lofað því að hann verður tekinn nokkrum sinnum niður," sagði hinn eitilharði varnarmaður Blika, Guðmann Þórisson.

„Við strákarnir erum ekkert fúlir út í hann að fara. Hann tók bara þá ákvörðun sem hann taldi vera besta fyrir sig. Hann fær samt að finna aðeins fyrir því," sagði Guðmann.

Arnar Grétarsson snýr aftur í leikmannahóp Blika í kvöld en hann hefur verið meiddur.

„Það er fín stemning í hópnum og fríið farið vel í menn. Mér finnst alltaf gaman að spila á móti Val og hefur iðulega gengið vel gegn þeim. Ég held að Valsmönnum þyki ekkert gaman að koma í Kópavoginn og það verður engin breyting á því í kvöld," sagði Guðmann ákveðinn.

Leikurinn hefst klukkan 20.00 og verður lýst beint á Boltavakt Vísis og Fréttablaðsins.