Luca Kostic: Draumaúrslit

„Þetta eru algjör draumaúrslit fyrir okkur. Fyrir leikinn voru margir leikmenn tæpir hjá mér en það gerir þennan sigur enn sætari," sagði Luca Kostic, þjálfari Grindvíkinga eftir sigurinn á Þrótti í kvöld 2-1.

Grindvíkingar skoruðu tvö mörk gegn vindinum í fyrri hálfleik. „Þróttarar voru sterkari í fyrri hálfleik og því gott að ná þessum mörkum. Við vorum hinsvegar með tökin í seinni hálfleiknum," sagði Luca.

„Ég er alveg í skýjunum með að hafa náð í fjögur stig úr þessum fyrstu tveimur leikjum. Ég vissi að það væru hæfileikaríkir leikmenn í þessu liði og það getur gert góða hluti."

Gunnar Oddsson, þjálfari Þróttara, var skiljanlega ósáttur í leikslok en hans menn sitja á botni deildarinnar eftir úrslit kvöldsins.

„Ég er ósáttur við að við náðum ekki að skora meira á þá í fyrri hálfleiknum því við fengum svo sannarlega færi til þess. Svo set ég spurningamerki við annað markið hjá Grindvíkingum því mér fannst vera brot á undan en hlakka til að sjá það í sjónvarpinu," sagði Gunnar.

„Við verðum bara að sækja stig strax í næsta leik. Það er bara þannig," sagðu Gunnar en Grindavík heimsækir Val í næsta leik.