Afhommunarmeðferðir sagðar skaðlegar

Ameríska Sálfræðingafélagið leggst gegn því að geðheilbrigðisstarfsfólk ráðleggi samkynhneigðum skjólstæðingum að breyta kynhneigð sinni með því að leita sálfræðimeðferða eða annarra meðferðarúrræða. Þetta kemur fram í ályktun sem félagið sendi út frá sér á miðvikudaginn síðasta. Ennfremur að foreldrar, forráðamenn, ungt fólk og fjölskyldur forðist að mæla með slíkum meðferðum sem byggja á þeirri hugmynd að samkynhneigð sé geðsjúkdómur eða þroskaröskun.

Ályktun Sálfræðingafélagsins byggir á stórri rannsókn sem sýnir að fátt bendir til þess að hægt sé að breyta kynhneigð homma og lesbía. Slík meðferð geti þvert á móti verið skaðleg og leitt til sjálfsmorða, þunglyndis, kvíða og minni kynvitundar.

„Fagmenn geta hjálpað skjólstæðingum sínum með meðferð, sem ekki byggir á því að reyna að breyta kynhneigð, heldur að reyna að sætta sig við, styðja og kanna eigin stöðu eða sjálf," segir Judith Glassgold, sem fór fyrir rannsókn sálfræðinganna.