Bankamenn átaldir fyrir milljarðakröfur

„Mér finnst þetta vera veruleikafirrtir siðleysingjar að láta sér koma til hugar að tefla fram kröfum af þessu tagi," segir Ögmundur Jónasson, alþingismaður Vinstri grænna, um fjárkröfur háttsettra fyrrum starfsmanna Landsbanka Íslands.

Fimmtán starfsmenn Landsbankans krefjast samtals 2,6 milljarða króna af þrotabúi bankans. Hæsta krafan er 490 milljónir. Fimm fyrrverandi starfsmenn vilja yfir 200 milljónir í sinn hlut. Slitastjórn bankans hefur ekki tekið afstöðu til þessara krafna.

„Þetta eru óskaplega háar tölur sem þarna er um að ræða og þær undirstrika þær öfgar sem voru í gangi," segir Illugi Gunnarsson, sem kveðst vilja skoða málið betur áður en hann tjáir sig nánar um það.

Friðbert Traustason, formaður Samtaka starfsmanna fjármálafyrirtækja, segir erfitt að sakast við þá sem sæki rétt sinn samkvæmt samningum.

„Ég hef alltaf sagt að það ætti frekar að sakast við þá sem gerðu þessa samninga við þessa menn," segir Friðbert.

Ögmundur segir ótrúlegt að sjá slíkar kröfur á meðan þjóðin sé á hliðinni.

„Verið er að skerða bætur almannatrygginga, það hefur verið til umræðu að skerða atvinnuleysisbætur. Við erum að skera niður í heilbrigðismálum og á sama tíma eru menn að tefla fram kröfum sem eru byggðar á bónussamningum, kaupréttarsamningum og öðru af því tagi. Mér finnst menn vera gengnir út úr því landakorti sem heitir það Ísland sem ég vil kannast við," segir Ögmundur. - gar / sjá síðu 6