Umfjöllun: Fylkismenn skutust upp í annað sætið

Fylkismenn gerðu góða ferð á Fjölnisvöll og unnu verðskuldaðan 1-3 sigur gegn Fjölnismönnum. Fylkir komst með sigrinum upp í annað sæti deildarinnar en Fjölnir er áfram í erfiðum málum í neðri hlutanum.

Jafnræði var með liðunum framan af leik og ekki mikið um opin marktækifæri. Mesta ógnin kom þá úr föstum leikatriðum og liðin skiptust á að sækja.

Eftir rúman hálftíma leik náðu Fylkismenn hins vegar að galopna Fjölnisvörnina þegar bakvörðurinn Andrés Már Jóhannesson lék upp hægri kantinn og stakk svo boltanum inn fyrir vörn Fjölnis á Ingimund Níels Óskarsson. Ingimundur lék laglega á Þórð Ingason í markinu og skoraði af öryggi og kom gestunum yfir í leiknum, 0-1.

Stuttu síðar opnaðist vörn Fjölnis að nýju þegar Ingimundur átti stungusendingu á Kjartan Ágúst Breiðdal sem lék á Þórð og renndi boltanum í autt markið. Fjölnismenn voru í stökustu vandræðum á þessum tímapunkti í leiknum og varnarleikur liðsins eins og gatasigti.

Pape Mamadou Faye hefði getað skorað þriðja mark Fylkis, sem hefði líklega gert út um leikinn, en Þórður sá við honum og bjargaði í horn.

Nokkuð gegn gangi leiksins náðu Fjölnismenn svo að minnka muninn í lok fyrri hálfleiks en markið var af dýrari gerðinni. Illugi Þór Gunnarsson fékk boltann á miðjum vallarhelmingi Fylkis og lét skot ríða af á 25 metra færi og skoraði glæsilegt mark, í stöngina og inn. Fjölnismenn voru því komnir inn í leikinn að nýju þegar hálfleiksflautan gall og staðan 1-2.

Fjölnismenn gerðu breytingar á vörn sinni í hálfleik og Gunnar Már Guðmundsson sem byrjaði leikinn í miðverðinum var færður framar á völlinn. Fylkismenn neyddust líka til þess að gera breytingu þar sem Andrés þurfti að fara út af meiddur.

Í stað þess að Fjölnismenn næðu að hamra járnið á meðan það væri heitt og jafna, þá bættu Fylkismenn við þriðja markinu á 53. mínútu og gerðu nánast út um leikinn.

Ingimundur sótti aukaspyrnu rétt utan vítateigs og skoraði svo sjálfur úr henni með föstu skoti í gegnum varnarvegg Fjölnis.

Leikurinn datt örlítið niður eftir þriðja mark Fylkis en sigur gestanna var í raun aldrei í mikilli hættu. Leikurinn fjaraði smátt og smátt út og Fylkismenn unnu 1-3 og gátu verið sáttir með enn einn sigurinn í sumar.

Fjölnismenn þurfa hins vegar að fara að taka sér tak og finna lausn á varnarvandræðum sínum. Þá var sóknarleikur liðsins í dag afar slakur og hugmyndasnauður.

Tölfræðin:

Fjölnir - Fylkir 1-3

0-1 Ingimundur Níels Óskarsson (31.)

0-2 Kjartan Ágúst Breiðdal (38.)

1-2 Illugi Þór Gunnarsson (45.)

1-3 Ingimundur Níels Óskarsson (53.)

Fjölnisvöllur. Áhorfendur: ???

Dómari: Þóroddur Hjaltalín (4)

Skot (á mark): 13-15 (8-6)

Varin skot: Þórður 2 - Fjalar 6

Horn: 5-6

Aukaspyrnur fengnar: 22-23

Rangstöður: 2-5

Fjölnir (4-3-3):

Þórður Ingason 5

Gunnar Valur Gunnarsson 5

Gunnar Már Guðmundsson 5

(64., Kristinn Freyr Sigurðsson 4)

Eyþór Atli Einarsson 4

Magnús Ingi Einarsson 5

Heimir Snær Guðmundsson 4

(79., Ólafur Páll Johnson -)

Illugi Þór Gunnarsson 7

Ragnar Heimir Gunnarsson 6

Aron Jóhannsson 6

Jónas Grani Garðarsson 4

(88., Guðmundur Karl Guðmundsson -)

Andri Valur Ívarsson 5

Fylkir (4-3-3):

Fjalar Þorgeirsson 7

Andrés Már Jóhannsson 7

(46., Tómas Þorsteinsson 5)

Einar Pétursson 7

Kristján Valdimarsson 6

Þórir Hannesson 6

Valur Fannar Gíslason 7

Ólafur Ingi Stígsson 6

Halldór Fannar Hilmisson 6

(82., Albert Brynjar Ingason -)

Ingimundur Níels Óskarsson 8 *Maður Leiksins

Pape Mamadou Faye 4

(64., Kjartan Andri Baldvinsson 5)

Kjartan Ágúst Breiðdal 7