Dagur: Sjálfstæðisflokkurinn stefnulaus í skipulagsmálum

Dagur B. Eggertsson, borgarfulltrúi Samfylkingarinnar, segir ljóst að yfirstandi kjörtímabil sé að líða án þess að nokkurt markvert skref hafi verið stigið í skipulagsmálum. Sjálfstæðisflokkurinn sé klofinn og stefnulaus þar sem engin leið virðist vera til að festa hendur á stefnu flokksins í skipulagsmálum borgarinnar.

Júlíus Vífill Ingvarsson, borgarfulltrúi Sjálfstæðisflokksins og formaður skipulagsráðs, segir í Fréttablaðinu í dag honum lítist vel á að byggja nýrrar flugstöðvar í Skerjafirði í stað samgöngumiðstöðvar í Vatnsmýri. Dagur segir að þetta sé óþolandi stefnuleysi.

„Aðeins örfáir mánuðir eru einnig síðan meirihlutinn lagði í mikinn kostnað við að breyta skipulagi og legu Hlíðafótar til að skapa rými fyrir samgöngumiðstöðinni á öðrum stað. Þær framkvæmdir standa yfir þessa dagana og kosta borgarsjóð 450 milljónir í ár. Á sama tíma er skorið niður alls staðar í borgarrekstrinum. Ljóst er að þeir fjármunir hefðu verið vel þegnir til að verja velferð og grunnþjónustu borgarinnar," segir borgarfulltrúinn.

Dagur segir að ný flugstöð í Skerjafirði væri þvert á stefnu Reykjavíkurborgar um framtíð Vatnsmýrarinnar. „Sérstaklega athyglisvert er að yfirlýsing Júlíusar er þvert ofan í málflutning borgarstjóra og Gísla Marteins Baldurssonar formanns umhverfis- og samgönguráðs. Gísli Marteinn taldi reyndar í nýlegu viðtali að 4 milljarða töpuðust hvert ár sem flutningur flugvallar tefðist," segir Dagur.

Þá bendir borgarfulltrúinn á að örfáir mánuðir séu síðan Hanna Birna Kristjánsdóttir, borgarstjóri, og Kristján Möller, samgönguráherra, skrifuðu undir viljayfirlýsingu um að samgöngumiðstöð yrði á öðrum stað í samræmi við margra ára undirbúningsvinnu.